अकराशे कि.मी.पायी प्रवास करुन श्रीसंत मुक्ताबाई राम पालखीचे आज जळगांवी आगमन

लोकमाध्यम न्युज जळगाव दि. ४ ऑगस्ट २०२५ :जळगांव नगरीचे ग्रामदैवत श्रीराम मंदिर संस्थान (रामपेठ) संचलित श्री संत मुक्ताबाई राम पालखी आषाढी एकादशी निमित्त श्रीक्षेत्र पंढरपुर येथे आषाढी यात्रेकरीता पायी वारीकरीता ज्येष्ठ वट पौर्णिमेस दि. 10 जुन दिनी प्रस्थान झाली होती. दि.5 जुलै दशमीस पंढरपूर जवळ चिंचोली ग्रामी श्री संत निवृत्तीनाथ व श्री संत मुक्ताई यांचा भाऊ बहीण तसेच गुरुशिष्य भेट दर्शन सोहळा होऊन पालखी पंढरीत दाखल होते. या पालखी मागे भक्त शिरोमणी श्री संत नामदेव महाराज व इतर मान्यवर ज्ञानोबादी संत मंडळींच्या पालख्यांचे पंढरीत शुभागमन होते. श्रीक्षेत्र पंढरपूर येथे पाच दिवसात श्री संत मुक्ताई व प्रभू रामरायाचे पंचायतन मुर्तीस चंद्रभागेचे अवभुत स्नान पुजाभिषेक होऊन नगरप्रदक्षिणा, भगवान श्री पांडुरंगाचे व विविध संतांचे दर्शन होऊन पुढील संतांच्या मानाच्या पालख्या श्रीसंत मुक्ताबाई राम पालखी यांचेशी भेट होतात श्रीक्षेत्र पंढरपूर येथे श्री विठू माऊलीचे दर्शन घेऊन पालखी पुन्हा परतीला निघाली. जाऊन येऊन असुन 1100 कि. मी. पायी प्रवास करीत पालखी श्रीसंत अप्पा महाराज समाधी मंदिर, (जळगांव ) येथे दि. 4 ऑगस्ट 2025, सोमवार दिनी संध्याकाळी 5 वाजता आगमन होत आहे.श्री आप्पा महाराज समाधी येथे दुपारी 4 वाजता श्री मकरंद देशमुख (जळगाव) यांचे अभंगवाणी कार्यक्रम होईल. त्यानंतर 5 वाजता पालखीचे आगमन होईल.

श्री हरिपाठ भजन श्री आप्पा महाराजांची आरती व दर्शन होऊन. तसेच यावेळी जळगांव नगरीतील असंख्य भाविक भक्त पालखीच्या स्वागताला उपस्थित असतील. पालखी व वारकरी मंडळी श्रीसंत अप्पा महाराज समाधीचे दर्शन घेवुन मिरवणुकीने राजकमल चौक, सुभाष चौक, सराफ बाजार, रथ चौक, श्रीराम मंदिर, कोल्हेवाडा, श्रीसंत बाबजी महाराज मंदिर गोपाळपुरा, विठ्ठलपेठ, तेली चौक, राम मारोतीपेठ मार्गे श्रीराम मंदिरात रात्री 7 वाजता येईल. भजनाने पालखीच्या पायी वारीची सांगता होईल. समस्त भाविकांनी पालखीचे आपल्या परिसरात सडा संमार्जन रांगोळ्या काढून श्रीसंत मुक्ताबाईचे आरती करुन स्वागत करावे, सहभागी होवून दर्शनाचा लाभ घ्यावा असे आवाहन श्रीराम मंदिर संस्थान ने केले आहे.