नवनियुक्त पोलीस अधीक्षक श्रीकांत धिवरे यांनी डॉ. महेश्वर रेड्डी यांच्या कडून स्वीकारला पदभार

| लोकमाध्यम न्युज | जळगाव : (प्रतिनिधी) – जळगाव जिल्हा पोलीस दलाच्या नेतृत्वात आज महत्त्वपूर्ण बदल झाला असून, नवनियुक्त पोलीस अधीक्षक श्रीकांत धिवरे यांनी अधिकृतपणे पदभार स्वीकारला आहे. पोलीस मुख्यालयात आयोजित एका दिमाखदार सोहळ्यात मावळते पोलीस अधीक्षक डॉ. महेश्वर रेड्डी यांनी धिवरे यांच्याकडे पदभाराची सूत्रे सुपूर्द केली. याप्रसंगी जिल्हा पोलीस दलातील वरिष्ठ अधिकारी आणि कर्मचारी मोठ्या संख्येने उपस्थित होते.

पदभार हस्तांतरणानंतर डॉ. महेश्वर रेड्डी यांना जळगाव पोलीस दलाच्या वतीने भावपूर्ण निरोप देण्यात आला. डॉ. रेड्डी यांच्या कार्यकाळात त्यांनी जिल्ह्यातील गुन्हेगारीवर मिळवलेला वचक, कायदा व सुव्यवस्था अबाधित राखण्यासाठी केलेले विशेष प्रयत्न आणि राबवलेले विविध जनहितार्थ उपक्रम यांचा सहकाऱ्यांनी कृतज्ञतापूर्वक गौरव केला. त्यांच्या शिस्तप्रिय आणि कार्यक्षम नेतृत्वामुळे पोलीस दल अधिक सक्षम झाल्याची भावना यावेळी व्यक्त करण्यात आली.

नवनियुक्त पोलीस अधीक्षक श्रीकांत धिवरे यांचे जळगाव पोलीस दलाच्या परंपरेनुसार स्वागत करण्यात आले. पदभार स्वीकारल्यानंतर त्यांनी तातडीने कार्यारंभ करत विविध विभागांना भेटी दिल्या आणि कामकाजाचा सविस्तर आढावा घेतला. धिवरे यांच्या प्रदीर्घ अनुभवाचा जिल्ह्याच्या कायदा-सुव्यवस्थेला मोठा फायदा होईल, असा विश्वास पोलीस वर्तुळात व्यक्त केला जात आहे. प्रशासन अधिक पारदर्शक, गतिमान आणि जनतेसाठी उत्तरदायी ठेवण्यावर आपला भर राहणार असल्याचे संकेत त्यांनी पहिल्याच दिवशी दिले आहेत.

या सोहळ्याला अपर पोलीस अधीक्षक, उपविभागीय पोलीस अधिकारी, विविध पोलीस ठाण्यांचे प्रभारी अधिकारी उपस्थित होते. नव्या नेतृत्वाखाली प्रलंबित गुन्ह्यांचा निपटारा आणि आगामी सण-उत्सवांच्या पार्श्वभूमीवर कायदा-सुव्यवस्था अधिक मजबूत करण्यासाठी कोणती पावले उचलली जातात, याकडे आता संपूर्ण जिल्ह्याचे लक्ष लागले आहे. “जळगाव जिल्ह्याची परंपरा जपत कायदा-सुव्यवस्था अधिक भक्कम करणे तसेच पारदर्शक प्रशासन हेच माझे प्राधान्य असेल. असे प्रतिपादन नवनियुक्त पोलिस अधीक्षक श्रीकांत धिवरे यांनी केले.