१५४ वर्षांची परंपरा असलेल्या जळगाव नगरीचे ग्रामदैवत श्रीराम मंदिर संस्थानच्या रथोत्सवाची तयारी पूर्ण !

| लोकमाध्यम NEWS | जळगाव | ( पांडुरंग महाले) : जळगाव नगरीचे ग्रामदैवत व वारकरी संप्रदायाची थोर परंपरा लाभलेले श्रीराम मंदिर संस्थान (रामपेठ) जळगावचे विद्यमाने कार्तिकी प्रबोधनी एकादशी निमित्त प्रतिवर्षाप्रमाणे यंदाही भव्य श्रीराम रथ यात्रेचे कार्तिकी प्रबोधिनी एकादशी शनिवार दि. २१ नोव्हेंबर रोजी होत आहे. यासाठीची संपूर्ण तयारी झाली असून जळगाव नगरी श्रीराम रथोत्सव मोठ्या हर्षोल्हासात साजरा करण्यासाठी सज्ज झाली आहे. या रथोत्सवाकरिता अवघ्या महाराष्ट्राच्या विविध भागातून असंख्य भाविक दर्शनासाठी येत असतात. प्रत्यक्ष पंढरीचे पांडुरंग जळगावी येतात अशी भाविकांची श्रध्दा आहे.
दरवर्षाप्रमाणे यंदाही रथोत्सवासाठी जय्यत तयारी करण्यात आली असून, श्रीरामाच्या दर्शनासाठी शहरासह परिसरातील भाविक मोठ्या संख्येने उपस्थित राहणार आहेत. रथोत्सवानिमित्त मंदिर परिसरात आकर्षक सजावट करण्यात आली असून, विद्युत रोषणाई आणि फुलांच्या सजावटीने परिसर उजळून निघाला आहे.
कार्तिकी एकादशीनिमीत्त शनिवार दि.२१ रोजी पहाटे चार वाजता काकड आरती, प्रभू श्रीरामांच्या उत्सव मूर्तीस महाभिषेक, सकाळी सात वाजता महाआरती, सकाळी साडेसात ते साडेआठ सांप्रदायिक परंपरेचे भजन त्यानंतर मंदिराच्या प्रांगणात सकाळी साडेदहा वाजता श्रीराम रथाचे महापूजन वंशपरंपरेने श्रीराम मंदिर संस्थांचे प्रमुख विश्वस्त, विद्यमान पंचम गादीपती हरिभक्ती परायण श्री मंगेश महाराज जोशी (श्री अप्पा महाराजांचे पाचवे वंशज) यांचे हस्ते व शहरातील समस्त ब्रह्मवृंद मंडळी यांच्या वेद मंत्र घोषात होईल.या रथोत्सवाकरिता अवघ्या महाराष्ट्राच्या विविध भागातून असंख्य भाविक दर्शनासाठी येत असतात. प्रत्यक्ष पंढरीचे पांडुरंग जळगावी येतात अशी भाविकांची श्रध्दा आहे. वारकरी संप्रदायाचे थोर संत व श्रीराम मंदिर संस्थानचे मुळ सत्पुरूष संत अप्पा महाराज यांनी १७९४ साली हिंदू समाजातील १८ पगडजाती एकत्र करून हा रथोत्सव सोहळा प्रारंभ केला. आज १५४ वर्षे झाली जळगावकरांच्या असंख्य भाविक नागरीकांच्या सहकार्याने हा रथोत्सवाचा नंदादिप अखंडपणे तेवत आहे.
वंशपरंपरेने ह.भ.प.श्री.मंगेश महाराजांचे हस्ते श्रीराम रथाची महाआरती होवून संस्थानतर्फे उपस्थित प्रमुख अतिथी व रथोत्सवाचे मानकरी सेवाधारी यांचा सत्कार करण्यात येईल. त्यानंतर श्रीराम रथावर आरूढ होणारी प्रभू श्रीरामचंद्रांची उत्सवमूर्तीची आरती होवून रथावर मुर्ती विराजमान होईल. रथावर गरूड, मारुती, अर्जुन, दोन घोडे, इ. मुर्त्या तसेच पुष्पहारांनी सजवलेल्या श्रीराम रथाच्या दिंडीस सोहळ्यास प्रभु श्रीरामांच्या जयघोषात प्रारंभ होईल. रथाचे अग्रभागी सनई, नगारा वादन, चौघडा, झेंडेकरी, बँन्ड पथक, वारकरी सांप्रदायिक भजनी मंडळ, वावडदा, कुंवरस्वामी भजनी मंडळ वाघोड, व्यंकटेश भजनी मंडळ, देवपिंप्री, श्रीराम भजनी मंडळ, मेहरूण, तसेच आसपासचे खेडयावरील भजनी मंडळी, श्री संत मुक्ताबाईच्या पादुका असलेली पालखी व त्यामागे श्रीरामस्थ, असा भव्यदिव्य जलग्रामनगर दिंडी प्रदक्षिणा रथयात्रेस मिरवणुकीस सकाळी १२ वाजता रथोत्सवाचे मानकरी सेवाधारी यांच्या उपस्थितीत श्रीराम मंदिर येथून प्रारंभ होईल.
या रथोत्सवाचे यशस्वीतेसाठी श्रीराम मंदिर संस्थान प्रमुख विश्वस्त विद्यमान गादीपती ह.भ.प. गुरुवर्य मंगेश महाराज यांच्या मार्गदर्शनाखाली ह. भ. प. श्रीराम महाराज तसेच संस्थानचे विश्वस्त समस्त श्रीराम भक्त, मानकरी सेवेकरी मंडळीं परिश्रम घेत आहेत.
रथाचा मार्ग
श्रीराम मंदिर, भोईटे गढी, आंबेडकर नगर, तेली चौक, श्रीराम मंदिराचे मागील गल्लीतून, रथचौक, बोहरागल्ली, सुभाष चौक, सराफ बाजारातील श्री महालक्ष्मी मंदिर येथे भजनाचा कार्यक्रम होवून श्री मरिमाता मंदिर, भिलपुरा मार्गे भिलपुरा येथील श्री संत अप्पा महाराजांचे परममित्र श्री संत लालशाबाबा यांची समाधी येथे श्रीराम रथाचे सेवाधारी रामसेवक माल्यार्पण करतील. बालाजी मंदिर, रथचौकात रथ रात्री बारा वाजता येईल. प्रभू श्रीरामांच्या उत्सवमुर्तीस पालखीत ठेवून वाजतगाजत श्रीराम मंदिरात आणण्यात येईल.
रथोत्सवाच्या पार्श्वभूमीवर गर्दीचे नियोजन, वाहतूक व्यवस्था आणि सुरक्षिततेसाठी आवश्यक उपाययोजना करण्याची तयारी प्रशासनाकडून करण्यात येत आहे. श्रद्धा, भक्ती आणि सामाजिक एकोपा यांचा सुंदर संगम असलेला श्रीराम रथोत्सव जळगावकरांसाठी धार्मिक आनंदाची पर्वणी ठरणार आहे.





