जळगाव MIDC मध्ये भीषण आग; दोन कंपन्या जळून खाक

| लोकमाध्यम न्युज | जळगाव : (प्रतिनिधी) दि. २ मे – शहरातील औद्योगिक वसाहतीत (MIDC) शनिवारी दुपारी भीषण आगीची घटना घडून दोन नामांकित कंपन्या जळून खाक झाल्या. ‘जे’ सेक्टरमधील या घटनेमुळे संपूर्ण परिसरात एकच खळबळ उडाली असून आगीचे रौद्र रूप इतके भीषण होते की शहराच्या विविध भागांतून धुराचे लोट स्पष्टपणे दिसत होते.

मिळालेल्या माहितीनुसार, दुपारी सुमारे दोन वाजेच्या सुमारास ‘जे ब्रदर्स’ आणि ‘श्री एंटरप्रायझेस’ या कंपन्यांना अचानक आग लागली. ‘जे ब्रदर्स’मध्ये खोबरेल व सुगंधी तेलांचे पॅकिंग केले जात होते, तर शेजारील ‘श्री एंटरप्रायझेस’मध्ये प्लास्टिकच्या चटया तयार करण्याचे काम सुरू होते. दोन्ही ठिकाणी ज्वलनशील पदार्थांचा मोठा साठा असल्याने काही क्षणांतच आगीने विक्राळ रूप धारण केले.

आग लागल्यानंतर कंपन्यांमधून स्फोटांचे मोठे आवाज ऐकू येऊ लागले. तेलाचे डबे व रसायनांच्या पिंपांमुळे हे स्फोट होत असल्याचा प्राथमिक अंदाज असून या आवाजांमुळे नागरिकांमध्ये भीतीचे वातावरण निर्माण झाले.

घटनेची माहिती मिळताच MIDC पोलीस ठाण्याचे अधिकारी व कर्मचारी तसेच अग्निशमन दलाचे पथक तातडीने घटनास्थळी दाखल झाले. आगीवर नियंत्रण मिळवण्यासाठी युद्धपातळीवर प्रयत्न सुरू असून अग्निशमन दलाचे सहा बंब आतापर्यंत वापरण्यात आले आहेत. आगीची तीव्रता लक्षात घेता समोरील भारत गॅस गोदामातूनही पाण्याचा पुरवठा सुरू करण्यात आला आहे.

या भीषण आगीत दोन्ही कंपन्यांमधील कच्चा माल, यंत्रसामग्री आणि तयार साठा जळून खाक झाला असून कोट्यवधी रुपयांच्या नुकसानीचा अंदाज वर्तवण्यात येत आहे. सुदैवाने कोणतीही जीवितहानी झाल्याचे वृत्त नसले तरी आगीचे नेमके कारण अद्याप अस्पष्ट आहे. प्राथमिक अंदाजानुसार उष्णता किंवा शॉर्ट सर्किटमुळे ही आग लागली असावी, असा संशय व्यक्त केला जात आहे.