जिल्हा प्रशासनाचे नागरिकांना आवाहन – सतर्क राहा, सुरक्षित राहा; शासकीय यंत्रणा सज्ज
| लोकमाध्यम न्युज | जळगाव (प्रतिनिधी) दि. २९ : भारतीय हवामान विभाग (IMD) ने जळगाव जिल्ह्यासाठी रेड अलर्ट जारी केला असून, पुढील 24 ते 48 तासांत अतिवृष्टी होण्याची शक्यता व्यक्त केली आहे. यासोबतच जोरदार वारे, विजांचा कडकडाट तसेच काही ठिकाणी पूरसदृश परिस्थिती निर्माण होण्याची शक्यता असल्याने जिल्हा प्रशासनाने नागरिकांना आणि सर्व शासकीय विभागांना विशेष सतर्कतेच्या सूचना दिल्या आहेत.
शासकीय यंत्रणेला सतर्कतेचे आदेश
जिल्हा प्रशासनाने सर्व शासकीय अधिकारी व कर्मचाऱ्यांनी मुख्यालयात उपस्थित राहून सतर्क राहण्याचे निर्देश दिले आहेत. आपत्कालीन प्रतिसाद यंत्रणा, बचाव साहित्य आणि आवश्यक मनुष्यबळ सज्ज ठेवण्यास सांगण्यात आले आहे. पूरप्रवण क्षेत्रे, धरणे, नाले आणि नदीकाठांवर विशेष लक्ष ठेवण्याचे आदेश देण्यात आले असून, कोणतीही आपत्कालीन परिस्थिती उद्भवल्यास नियंत्रण कक्षाशी तात्काळ समन्वय साधण्याचे निर्देश आहेत. वीज, पाणीपुरवठा, आरोग्य, पोलीस, महसूल, ग्रामपंचायत आणि नगरपालिकांनी आवश्यक ती खबरदारी घ्यावी, असेही प्रशासनाने स्पष्ट केले आहे.
नागरिकांनी घ्यावयाची काळजी
अत्यावश्यक कामाशिवाय घराबाहेर पडणे टाळावे, नदी, नाले, पूल, धबधबे आणि पाण्याच्या प्रवाहाजवळ जाणे टाळावे, तसेच विजांचा कडकडाट सुरू असताना झाडाखाली उभे राहू नये किंवा मोकळ्या मैदानात जाऊ नये, असे आवाहन करण्यात आले आहे. हवामान विभाग आणि जिल्हा प्रशासनाच्या अधिकृत सूचनांचे पालन करण्याचे आवाहनही करण्यात आले आहे.
आपत्कालीन संपर्क
कोणतीही आपत्कालीन परिस्थिती उद्भवल्यास नागरिकांनी जिल्हा आपत्कालीन नियंत्रण कक्षाशी किंवा स्थानिक प्रशासनाशी तात्काळ संपर्क साधावा. जिल्हा आपत्कालीन नियंत्रण कक्षाचे दूरध्वनी क्रमांक 0257-2217193 आणि 0257-2223180 असून, WhatsApp हेल्पलाईन : 9373789064 उपलब्ध आहे.
