खासदार स्मिताताई वाघ ठरल्या संसद रत्न पुरस्काराच्या मानकरी; महाराष्ट्रातील सात खासदारांना संसद रत्न पुरस्कार

लोकमाध्यम न्युज जळगांव दि.१८ : संसदेत उत्कृष्ट कामगिरी आणि सातत्यपूर्ण योगदानासाठी दिला जाणारा प्रतिष्ठित संसदरत्न पुरस्कार २०२५ जाहीर झाला आहे. यंदा महाराष्ट्राच्या सात खासदारांनी या पुरस्कारावर आपले नाव कोरले आहे. लोकसभा आणि राज्यसभा सचिवालयाच्या अधिकृत आकडेवारीवर आधारित, संसदेतील उल्लेखनीय कार्यकौशल्यासाठी या खासदारांची निवड करण्यात आली आहे.

पुरस्कार प्राप्त खासदारांची यादी
सुप्रिया सुळे
श्रीरंग बारणे
अरविंद सावंत
नरेश म्हस्के
स्मिता वाघ
मेधा कुलकर्णी
वर्षा गायकवाड

याशिवाय, राष्ट्रीय स्तरावर भर्तृहरी महताब आणि एन. के. प्रेमचंद्रन यांनाही हा सन्मान जाहीर झाला आहे.प्राइम पॉइंट फाउंडेशन या संस्थेद्वारे दरवर्षी प्रदान केला जाणारा हा पुरस्कार संसदेतील खासदारांची उपस्थिती, प्रश्न उपस्थित करण्याची क्षमता, चर्चेतील सहभाग आणि विधेयक मांडणी यासारख्या निकषांवर आधारित आहे. हा पुरस्कार लोकशाही प्रक्रियेत सक्रिय योगदान देणाऱ्या खासदारांना प्रोत्साहन देणारा आणि त्यांच्या कार्याला सन्मान देणारा एक प्रतिष्ठित उपक्रम मानला जातो.जळगावच्या स्मिताताई वाघ यांनी या पुरस्कारामुळे आपल्या मतदारसंघाचा गौरव वाढविला आहे.

त्यांच्या संसदीय कार्यकौशल्याने जळगावकरांना अभिमानास्पद क्षण दिला आहे. संसदरत्न २०२५ हा पुरस्कार खासदारांच्या कर्तृत्वाला सलाम करणारा आणि लोकशाहीला बळकटी देणारा एक मैलाचा दगड आहे.

पुरस्काराची पार्श्वभूमी

भारताचे माजी राष्ट्रपती ए पी जे अब्दुल कलाम यांच्या आग्रहाखातर प्राइम प्वाइंट फाउंडेशनने हा पुरस्कार सुरू केला. 2010 ला या पुरस्काराचं अब्दुल कलाम यांनी उद्घाटन केलं. दर वर्षी संसदेत आपल्या कामाची छाप पाडणाऱ्या खासदारांना हा पुरस्कार दिला जातो. यंदा सात जानेवारीला या पुरस्काराची घोषणा झाली. त्यानंतर आज हे पुरस्कार वितरित केले जाणार आहेत.