दैनिक देशदूतचे संस्थापक देवकिसनजी सारडा यांचे देहावसान

लोकमाध्यम न्युज | जळगांव २० डिसेंबर २०२४

नाशिक । प्रतिनिधी । दैनिक ’देशदूत’चे संस्थापक आणि प्रख्यात उद्योजक देवकिसन सारडा यांचे आज (दि.२० शुक्रवार)दुपारी अडीच वाजेच्या सुमारास अल्पशा आजाराने निधन झाले. मृत्यूसमयी ते 92 वर्षांचे होते. नाशिक शहर, जिल्हा आणि महाराष्ट्राच्या औद्योगिक, सामाजिक, शैक्षणिक, सांस्कृतिक क्षेत्रांत सारडा यांनी भरीव योगदान दिले. सारडा यांच्या पश्चात दोन मुले, एक मुलगी, सुना, जावई, नातवंडे, पतवंडे असा मोठा परिवार आहे.
महाराष्ट्र चेंबर ऑफ कॉमर्स, सिन्नर व्यापारी बँक, नाशिक जिल्हा सहकारी बँक, जळगाव जिल्हा सहकारी बँक, नाशिक औदयोगिक सहकारी वसाहत (नाईस), नाशिक औदयोगिक कारखानदार संघ (निमा), ऑस्टीम, नाशिक शिक्षण प्रसारक मंडळ, महाराष्ट्र प्रदेश माहेश्वरी सभा, कुसुमाग्रज प्रतिष्ठान, यशवंतराव चव्हाण महाराष्ट्र मुक्त विद्यापीठ अशा विविध संस्थांवर त्यांनी विविध पदे भूषवली आहेत. चतुरस्त्र आणि आपल्या निष्ठांवर घट्ट उभे कणखर व्यक्तिमत्व असलेल्या सारडा यांच्या निधनाने नाशिकच्या औद्योगिक, सामाजिक, शैक्षणिक, सांस्कृतिक क्षेत्रांवर शोककळा पसरली आहे.