रावेर व यावल तालुक्यातील गारपिटीमुळे केळीचे नुकसान; आमदार अमोल जावळे यांच्यासह जिल्हाधिकारी आयुष प्रसाद यांनी केली पाहणी
लोकमाध्यम न्युज | जळगांव २८ डिसेंबर २०२४ |
जळगाव/ यावल :रावेर विधानसभा क्षेत्रात दि. 27 डिसेंबर रोजी झालेल्या अवकाळी पाऊस आणि भीषण गारपिटीमुळे केळी, हरभरा, गहू, तूर, पपई अशा विविध पिकांचे मोठ्या प्रमाणावर नुकसान झाले आहे. या नुकसानीची पाहणी करण्यासाठी आमदार अमोल जावळे यांनी जळगाव जिल्हाधिकारी आयुष प्रसाद आणि विभागीय अधिकाऱ्यांसोबत यावल तालुक्यातील भालोद, बामणोद, आमोदा, म्हैसवाडी, राजोरा, बोरावल आणि परिसरातील शेतशिवारांना भेट दिली.
पाहणी दरम्यान, आमदार अमोल जावळे यांनी प्रशासकीय अधिकाऱ्यांसोबत चर्चा करून नुकसानभरपाईसाठी पंचनामे व तत्सम कार्यवाही तात्काळ पूर्ण करण्यात यावी, अशी सूचना केली. गारपिटीमुळे झालेल्या नुकसानाचा अहवाल तयार करून शेतकऱ्यांना लवकरात लवकर मदत मिळावी, यासाठी प्रयत्नशील राहण्याचे आश्वासन त्यांनी दिले.
याप्रसंगी यावल प्रभारी तहसीलदार संतोष विनंते, कृषी अधिकारी भरत वारे, विस्तार अधिकारी किशोर सपकाळे, बामणोद मंडळ अधिकारी बबीता चौधरी, अंजाळे मंडळ अधिकारी रशिद तडवी, भागातील तलाठी आणि शेतकरी बंधू उपस्थित होते. भारतीय जनता पक्षाचे पदाधिकारी व कार्यकर्ते देखील या पाहणीसाठी उपस्थित होते.
आमदार अमोल जावळे यांनी गारपिटीमुळे नुकसान झालेल्या शेतकऱ्यांच्या अडचणी समजून घेतल्या आणि प्रशासनाकडून तातडीने मदत मिळावी, यासाठी शासन स्तरावर पाठपुरावा करण्यात येईल, असे स्पष्ट केले.
याप्रसंगी भाजपाचे जिल्हा उपाध्यक्ष तथा कृषी उत्पन्न बाजार समितीचे माजी सभापती हिरालाल चौधरी, कृषी भूषण नारायण चौधरी, जिल्हा बँक माजी संचालक गणेश गिरधर नेहेते, जि.प.चे माजी सदस्य भरत महाजन, भाजपा माजी तालुका अध्यक्ष डॉ. नरेंद्र कोल्हे, म्हैसवाडीचे सरपंच सुजित चौधरी, कोसगावचे माजी सरपंच चंपालाल पाटील यांच्यासह शेतकरी वर्ग मोठ्या संख्येने यावेळी उपस्थित होते.
