नामांकित सुवर्णपेढ्यांना ‘लेडी स्नॅचर’चा गंडा; साडेचार लाखांचे दागिने लंपास!

| लोकमाध्यम न्युज जळगाव | दि. ७ नोव्हेंबर : शहरातील सुवर्णपेढ्यांतून एका अज्ञात ‘लेडी स्नॅचर’ने केवळ अर्ध्या तासात साडेचार लाख रुपयांचे सोन्याचे दागिने लंपास केल्याच्या घटना उघडकीस आल्या आहेत. हातचलाखी आणि गुंतागुंतीच्या युक्त्या वापरत या महिलेने शहरातील तीन नामांकित सुवर्णपेढ्यांना गंडा घातला असून, व्यापारी वर्गात भीतीचे वातावरण निर्माण झाले आहे.

दि. २७ ऑक्टोबर रोजी सायंकाळी ५ वाजता सुभाष चौकातील आर.सी. बाफना ज्वेलर्समध्ये हिरव्या रंगाचा पंजाबी ड्रेस परिधान केलेली महिला अंगठ्या पाहण्याच्या बहाण्याने आली. सेल्समनचे लक्ष विचलीत करून तिने १ लाख ८५ हजार रुपयांच्या दोन सोन्याच्या अंगठ्या लंपास केल्या आणि नकली अंगठ्या ट्रेमध्ये ठेवल्या.

यानंतर अवघ्या अर्ध्या तासात तीच महिला भंगाळे गोल्ड ज्वेलर्समध्ये गेली आणि त्याच पद्धतीने १ लाख ४५ हजार रुपयांची अंगठी चोरून नेली.

दरम्यान, जिल्हापेठ पोलीस ठाण्याच्या हद्दीत सायंकाळी ६ ते ७ दरम्यान तिने आणखी पी.एन.गाडगीळ सुवर्णपेढीत १ लाख ४० हजार रुपयांची अंगठी लंपास केली. तिन्ही घटनांमध्ये एकाच महिलेचा सहभाग असल्याचे सीसीटीव्हीत स्पष्ट दिसत असून, पोलिसांनी तिच्या शोधासाठी विशेष पथक तयार केले आहे. सदरची महिला मध्य प्रदेशातील असल्याचे कळते. शनिपेठ पोलिस ठाण्यातील तपास पोहेकॉम प्रदीप नन्नवरे करीत आहेत.