जळगाव एलसीबीची मोठी कारवाई; एटीएम मशीन पळवणारी आंतरराज्य टोळी गजाआड

| लोकमाध्यम न्युज | जळगाव : (प्रतिनिधी) – जळगाव शहरातील इक्विटास स्मॉल फायनान्स बँकेचे अख्खे एटीएम मशीन चोरून नेणाऱ्या आंतरराज्यीय टोळीचा स्थानिक गुन्हे शाखेने (LCB) पर्दाफाश केला आहे. उत्तर प्रदेशातील सहारनपूर जिल्ह्यातील दोन अट्टल गुन्हेगारांना पोलिसांनी शिताफीने अटक केली असून, त्यांच्याकडून गुन्ह्यात वापरलेली दुचाकी आणि मोबाईल असा मुद्देमाल जप्त करण्यात आला आहे. या कारवाईमुळे केवळ जळगावच नव्हे, तर पुणे आणि इतर राज्यांतील एटीएम चोरीचे मोठे गुन्हे उघडकीस आले आहेत.

गोपनीय माहिती अन् थरारक पाठलाग

दिनांक ३ एप्रिल २०२६ रोजी जळगाव शहरातील पोलन पेठ परिसरातील इक्विटास बँकेचे एटीएम मशीन अज्ञात चोरट्यांनी पळवून नेले होते. या धाडसी चोरीचा तपास करण्यासाठी पोलीस अधीक्षक डॉ. महेश्वर रेड्डी यांनी स्थानिक गुन्हे शाखेला आदेश दिले होते. पथक समांतर तपास करत असतानाच, हे चोरटे पुन्हा एकदा चोरीच्या उद्देशाने जळगावात येणार असल्याची गोपनीय माहिती मिळाली. त्यानुसार पथकाने १४ एप्रिल रोजी मन्यारखेडा रोडवर सापळा रचून मोबीन आत्मज मिला (वय २८) आणि अब्दुल करीम नूर हसन (वय ५२, दोन्ही रा. सहारनपूर, उत्तर प्रदेश) या दोघांना ताब्यात घेतले. त्यांनी शनीपेठ हद्दीतून चोरलेल्या महिंद्रा पिकअपचा वापर करून एटीएम मशीन पळवल्याची कबुली दिली आहे.

चोरीच्या गाडीचा वापर आणि गुन्ह्याची कबुली

तपासादरम्यान आरोपींनी धक्कादायक माहिती दिली आहे. या टोळीने जळगावात एटीएम पळवण्यासाठी शनीपेठ पोलीस ठाण्याच्या हद्दीतून एक महिंद्रा पिकअप गाडी चोरली होती, जिचा वापर चोरीच्या रात्री करण्यात आला. या गुन्ह्यात त्यांच्यासोबत फरहान, अकबर आणि मुजाहोद (सर्व रा. उत्तर प्रदेश) यांचाही समावेश असून पोलीस आता त्यांचा शोध घेत आहेत. या टोळीने केवळ जळगावच नव्हे, तर पुणे ग्रामीणमधील यवत, झारखंड आणि संपूर्ण भारतभर अशाच प्रकारचे धाडसी गुन्हे केल्याची कबुली दिली आहे.

तपास पथकातील पोलीस अधिकारी व अंमलदार

ही धाडसी कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक संदीप गावीत आणि उपविभागीय पोलीस अधिकारी नितीन गणापुरे यांच्या मार्गदर्शनाखाली वरिष्ठ पोलीस निरीक्षक राहुल गायकवाड यांच्या नेतृत्वातील पथकाने केली. या पथकात पोलीस उपनिरीक्षक शरद बागल, सोपान गोरे, शेखर डोमाळे, जितेंद्र वल्टे, श्रेणी पोलीस उपनिरीक्षक रविंद्र नरवाडे, सहाय्यक फौजदार अतुल वंजारी, पोलीस हवालदार विजय पाटील, अक्रम शेख, नितीन बाविस्कर, मुरलीधर धनगर, लक्ष्मण पाटील, सलीम तडवी, विनोद पाटील, प्रविण भालेराव, पोलीस नाईक किशोर पाटील, विकास सातदिवे, श्रीकृष्ण देशमुख आणि पोलीस अंमलदार रवींद्र कापडणे, राहुल रगडे, सिध्देश्वर डापकर, राहुल वानखेडे, प्रशांत परदेशी, छगन तायडे, हेमंत पाटील, रविंद्र चौधरी, सचिन घुगे, चालक दिपक चौधरी, बाबासाहेब पाटील, प्रविण हिवराळे, दर्शन ढाकणे, रिझवान शेख, प्रदिप चौरे तसेच तांत्रिक मदतीसाठी गौरव पाटील यांचा समावेश होता.

भारतभर गुन्ह्यांचे जाळे

अटक करण्यात आलेल्या आरोपींनी महाराष्ट्र (जळगाव, पुणे ग्रामीण-यवत) आणि झारखंडसह भारतभर एटीएम चोरीचे गुन्हे केल्याचे कबूल केले आहे. आरोपी मोबीन मिला याच्यावर उत्तर प्रदेशात खुनाचा प्रयत्न आणि तोडफोडीचे गुन्हे दाखल आहेत. पोलिसांनी त्यांच्याकडून ६१,२०० रुपयांचा मुद्देमाल जप्त केला असून, या टोळीतील फरार साथीदार फरहान, अकबर आणि मुजाहोद यांचा शोध पोलीस घेत आहेत. जळगाव शहर पोलीस ठाण्याचे सहाय्यक पोलीस निरीक्षक सुरेश आव्हाड या गुन्ह्याचा पुढील तपास करत आहेत.

“आंतरराज्यीय टोळीला अटक केल्यामुळे एटीएम चोरीच्या अनेक मोठ्या गुन्ह्यांची साखळी उघड झाली आहे. तांत्रिक आणि गोपनीय माहितीच्या आधारे आम्ही या टोळीपर्यंत पोहोचलो असून, फरार असलेल्या इतर साथीदारांनाही लवकरच जेरबंद करण्यात येईल.”

— डॉ. महेश्वर रेड्डी (पोलीस अधीक्षक, जळगाव)