CEIR पोर्टल व तांत्रिक विश्लेषणाच्या मदतीने ३ लाख रुपयांचे मोबाईल हस्तगत; जळगाव पोलिसांच्या विशेष मोहिमेला यश
| लोकमाध्यम News | जळगाव (प्रतिनिधी) : जळगाव जिल्ह्यातील एम.आय.डी.सी. पोलीस ठाण्याच्या पोलिसांनी हरवलेले व गहाळ झालेले मोबाईल फोन शोधून ते मूळ मालकांना परत मिळवून देण्यात उल्लेखनीय कामगिरी केली आहे. पोलिसांनी एकूण १८ मोबाईल फोन शोधून हस्तगत केले असून, या मोबाईलची अंदाजित किंमत ३ लाख रुपये आहे. पोलिसांच्या या कामगिरीमुळे मोबाईल हरवलेल्या नागरिकांना मोठा दिलासा मिळाला आहे.
जिल्हा पोलीस अधीक्षक श्रीकांत धिवरे यांनी जिल्ह्यातील सर्व पोलीस ठाण्यांच्या प्रभारी अधिकाऱ्यांना नागरिकांचे हरवलेले व गहाळ झालेले मोबाईल फोन शोधून मूळ मालकांना परत मिळवून देण्याच्या सूचना दिल्या होत्या. त्यानुसार एम.आय.डी.सी. पोलीस ठाण्याच्या पथकाने विशेष मोहीम राबवून मोबाईल शोधण्याची कारवाई केली.
या मोहिमेत CEIR (Central Equipment Identity Register) पोर्टल तसेच तांत्रिक विश्लेषणाचा प्रभावी वापर करण्यात आला. मोबाईलच्या तांत्रिक माहितीचे विश्लेषण करून हरवलेल्या मोबाईल फोनचा शोध घेण्यात पोलिसांना यश आले. त्यानंतर हे मोबाईल हस्तगत करून संबंधित नागरिकांना परत देण्याची कार्यवाही करण्यात आली.
या मोहिमे दरम्यान पोलीस पो.हे.कॉ.मोतीलाल विठ्ठल बोरेसे, पो. कॉ. प्रमोद लाडवंजारी तसेच महिला पोलीस अंमलदार रामकला राठोड यांनी तांत्रिक माहितीचे विश्लेषण करून हरवलेल्या मोबाईल फोनचा शोध घेण्यासाठी महत्त्वपूर्ण योगदान दिले.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावित, उपविभागीय पोलीस अधिकारी नितीन गणापुरे यांच्या मार्गदर्शनाखाली तसेच पोलीस निरीक्षक बबन आव्हाड यांच्या नेतृत्वाखाली पोलीस उपनिरीक्षक चंद्रकांत धनके, श्रेणी पोलीस उपनिरीक्षक विजयसिंग पाटील, पो.हे.कॉ. मोतीलाल विठ्ठल बोरसे, पो.हे.कॉ. प्रमोद लाडवंजारी व म.पो.अं. / रामकला राठोड यांनी ही मोहीम यशस्वी केली.
हरवलेले मोबाईल शोधून ते नागरिकांना परत मिळवून देण्याच्या या कामगिरीमुळे जळगाव पोलिसांच्या तांत्रिक तपास कौशल्याचे आणि नागरिकांप्रती असलेल्या बांधिलकीचे दर्शन घडले आहे. पोलिसांच्या या उपक्रमाचे नागरिकांकडून स्वागत होत आहे.
