ज्येष्ठ गायिका आशा भोसले यांचे ९२ व्या वर्षी निधन; संगीतविश्व पोरकं

| लोकमाध्यम न्युज | जळगाव : मुंबई : (प्रतिनिधी) –भारतीय संगीतविश्वाला मोठा धक्का देत ज्येष्ठ पार्श्वगायिका आशा भोसले यांचे वयाच्या ९२ व्या वर्षी निधन झाले. सहा दशकांहून अधिक काळ आपल्या मधुर आणि बहुरंगी आवाजाने रसिकांच्या मनावर अधिराज्य गाजवणाऱ्या आशाताईंच्या जाण्याने संपूर्ण देश शोकमग्न झाला आहे.

सुरेल कारकिर्दीचा सुवर्णअध्याय

भारतरत्न लता मंगेशकर यांच्या लहान बहिणी असलेल्या आशा भोसले यांनी हिंदीसह मराठी, बंगाली, गुजराती, तमिळ, तेलुगू अशा विविध भाषांमध्ये हजारो गाणी गाऊन आपला वेगळा ठसा उमटवला. त्यांच्या कारकिर्दीत त्यांनी आर. डी. बर्मन, ओ. पी. नय्यर, एस. डी. बर्मन आणि लक्ष्मीकांत-प्यारेलाल यांसारख्या दिग्गज संगीतकारांसोबत काम करत अनेक अजरामर गाणी दिली. ‘दम मारो दम’ आणि ‘ओम शांती ओम’सारखी गाणी आजही रसिकांच्या ओठांवर आहेत.

अंत्यदर्शन व अंत्यसंस्कार

त्यांच्या निधनाची माहिती त्यांचे पुत्र आनंद भोसले यांनी दिली. सोमवारी सकाळी ११ ते दुपारी ३ या वेळेत चाहत्यांना अंत्यदर्शन घेता येणार असून, त्यानंतर अंत्ययात्रा काढण्यात येणार आहे. सायंकाळी ४ वाजता मुंबईतील शिवाजी पार्क येथे शासकीय इतमामात अंत्यसंस्कार करण्यात येणार आहेत.

आजारीपणाशी झुंज अपयशी

गेल्या काही दिवसांपासून आशाताईंची प्रकृती खालावलेली होती. छातीत संसर्ग व अशक्तपणामुळे त्यांना ब्रीच कँडी रुग्णालय येथे दाखल करण्यात आले होते. उपचार सुरू असतानाच त्यांनी अखेरचा श्वास घेतला.

देशभरातून श्रद्धांजली

त्यांच्या निधनानंतर चाहत्यांची व मान्यवरांची मोठी गर्दी उसळली असून, राजकीय, सांस्कृतिक व चित्रपटसृष्टीतील दिग्गजांकडून शोकसंदेशांचा वर्षाव होत आहे. भारतीय संगीताचा एक सुवर्णअध्याय आज संपल्याची भावना सर्वत्र व्यक्त होत आहे.