जळगावात विशेष नाकाबंदी मोहीम; २१०० हून अधिक वाहनांची तपासणी

| लोकमाध्यम न्युज | जळगाव : जिल्ह्यात कायदा व सुव्यवस्था अबाधित राखण्यासाठी आणि रस्ते सुरक्षा नियमांची प्रभावी अंमलबजावणी करण्यासाठी जळगाव जिल्हा पोलीस दलातर्फे विशेष नाकाबंदी मोहीम राबविण्यात आली. पोलीस अधीक्षक श्रीकांत धिवरे यांच्या मार्गदर्शनाखाली २४ एप्रिल रोजी सायंकाळी ६ ते रात्री १०.३० या वेळेत जिल्हाभर ही मोहीम पार पडली.

या मोहिमेत जिल्ह्यातील महत्त्वाच्या ५९ ठिकाणी नाकाबंदी करून ४८ अधिकारी आणि २१६ अंमलदारांनी संयुक्तपणे कडक तपासणी केली. दरम्यान सुमारे २१०० ते २२०० वाहनांची तपासणी करण्यात आली.

वाहतूक नियमांचे उल्लंघन करणाऱ्यांवर कडक कारवाई करत मोटार वाहन कायद्यांतर्गत ३७४ प्रकरणे नोंदवण्यात आली असून, एकूण २ लाख ३८ हजार ६५० रुपयांचा दंड वसूल करण्यात आला. तसेच मद्यप्राशन करून वाहन चालवणाऱ्या ५ चालकांविरुद्ध गुन्हे दाखल करण्यात आले.

फक्त वाहतूक नियमांपुरतीच कारवाई न ठेवता सार्वजनिक ठिकाणी टवाळखोरी करणाऱ्या ४६ व्यक्तींवर प्रतिबंधात्मक कारवाई करण्यात आली. तसेच सार्वजनिक ठिकाणी मद्यप्राशन करणाऱ्या १३ जणांविरुद्ध १५ प्रकरणे नोंदवण्यात आली आहेत.

ही कारवाई जळगाव शहरातील एमआयडीसी, शनिपेठ, जिल्हापेठ, रामानंद नगर तसेच भुसावळ, रावेर, चोपडा, चाळीसगाव आणि पाचोरा या भागांत मोठ्या प्रमाणावर करण्यात आली.

या मोहिमेमुळे गुन्हेगारी प्रवृत्तीवर आळा बसण्यास मदत होणार असून नागरिकांनी पोलीस प्रशासनास सहकार्य करावे आणि वाहतूक नियमांचे पालन करावे, असे आवाहन पोलीस प्रशासनाकडून करण्यात आले आहे.