‌‘आमदार सांस्कृतिक महोत्सवा’ चे जळगावच्या अभिनेत्री तन्वी मल्हाराने केले उद्घाटन

लोकमाध्यम न्युज | जळगाव दिनांक २२ ऑगस्ट २०२४ |

आपल्या जळगाव शहराचा ‘आमदार सांस्कृतिक महोत्सवास’ गुरूवार ,22 ऑगस्टपासून छत्रपती संभाजीराजे नाट्यगृहात मोठ्या उत्साहात सुरवात झाली. जळगावची कन्या व ‌‘वेदा’ चित्रपटातील अभिनेत्री तन्वी मल्हारा हीने महोत्सवाचे उद्घाटन केले. अध्यक्षस्थानी आमदार  राजु मामा भोळे उपस्थित होते.

यावेळी मंचावर माजी महापौर सीमा भोळे, भारती सोनवणे, ॲड.शुचिता हाडा, दीपमाला काळे, रंजना वानखेडे, सुरेखा तायडे, रेखा वर्मा, कुमुदिनी नारखेडे उपस्थित होते. मान्यवरांच्या हस्ते दीपप्रज्वलन करून भगवान नटराज यांच्या मूर्तीला पुष्पहार अर्पण करण्यात आले. समन्वयक सचिन महाजन यांनी प्रस्तावना केली.

आमदार सुरेश भोळे यांनी अध्यक्षीय भाषणात सांगितले की, आपल्या संस्कृतीची, लोकपरंपरांची आणि लोककलांची ओळख विद्यार्थी – विद्यार्थिनींना व्हावी, त्यांच्या जडणघडणीला विविध कलांचा आयाम लाभून उद्याचा जागरुक व सुसंस्कृत नागरिक घडावा, या उद्देशाने दि. 22 ते 25 ऑगस्टदरम्यान आमदार सांस्कृतिक महोत्सवाचे आयोजन करण्यात आले असल्याचे म्हणाले.
यावेळी विविध क्षेत्रातील मान्यवर महिलादेखील मंचावर उपस्थित होत्या. यात डॉ. प्रीती दोषी, संध्या सोनवणे, अर्चना जाधव, शुभश्री दप्तरी, वैशाली सपकाळे, डॉ. एकता चौधरी, मेघा गोरडे, संगीता पाटील, मीनल जैन, भाग्यश्री सराफ, नीला चौधरी उपस्थित होत्या. सूत्रसंचालन विनोद ढगे यांनी केले.
महोत्सवात सुगम गायन, एकल नृत्य प्रकारात रंगत
शेकडो स्पर्धकांनी महोत्सवात सहभाग घेतला असून एकूण 11 स्पर्धा घेण्यात येणार आहेत.
गुरुवार, 23 ऑगस्ट रोजी सकाळी रांगोळी व मेहंदी स्पर्धाचे आयोजन करण्यात आले होते. रांगोळीत 150 तर मेहंदी 50 जणांनी सहभाग घेतला होता. त्यानंतर शालेय व खुला गटात समूह गायन स्पर्धा झाल्या. शालेय 13 तर खुल्या गटात 6 जणांनी सादरीकरण केले. दुपारी 1 वाजता एकल नृत्य स्पर्धेत 100 स्पर्धकांनी त्यांचे सादरीकरण केले.

कौशल्य पणास लावत आवडत्या कला प्रकारात करीअर करावे
स्पर्धकांनी आपले कौशल्यपणाला लावून सादरीकरण करावे. आपल्या आवडत्या कलाप्रकारातून करिअर करायचे असेल तर निश्चितच ध्येयप्रती सचोटीने वाटचाल करावी. निश्चितच आपल्याला यश मिळते.
– तन्वी मल्हारा, सिने अभिनेत्री, जळगाव