मध्यप्रदेशातून आंतरराज्य टोळीला अटक, ११ लाखांचा माल जप्त

| लोकमाध्यम न्युज | जळगाव (प्रतिनिधी) : शहरातील एअरपोर्ट परिसरातील तारा बिझनेस पार्कमध्ये झालेल्या मोठ्या घरफोडीचा एमआयडीसी पोलिसांनी छडा लावला आहे. मध्यप्रदेशातील सेंधवा येथील दुर्गम भागात वेशांतर करून शिरलेल्या जळगाव पोलीस पथकाने ६ जणांना बेड्या ठोकल्या असून ११ लाख ५० हजार रुपयांचा मुद्देमाल हस्तगत केला आहे.

घटनेची पार्श्वभूमी

तारा बिझनेस पार्क भागातील रहिवासी मोईज अब्बाज बोहरा हे परिवारासह बाहेरगावी गेलेले असताना, १५ एप्रिलच्या सुमारास त्यांच्या बंद घराचे कुलूप तोडून चोरी झाली होती. याप्रकरणी एमआयडीसी पोलीस ठाण्यात गुन्हा दाखल करण्यात आला होता.

पोलीस निरीक्षक बबन आव्हाड यांच्या मार्गदर्शनाखाली पीएसआय राहुल तायडे आणि पीएसआय चंद्रकांत धनके यांच्या पथकाने तांत्रिक तपास केला. आरोपी मध्यप्रदेशातील सेंधवा येथील अतिशय दुर्गम भागात असल्याचे समजताच पोलिसांनी तिथे वेशांतर करून पाळत ठेवली. निलेश उर्फ भुऱ्या डुडवे, ताराचंद सोलंखी, सायसिंग सोलंखी, रविंद्र आर्य, दिलीप डुडवे आणि ग्यारशीलाल अलावे (सर्व रा. सेंधवा, म.प्र.) यांना अटक करण्यात आली.

आरोपींकडून ३९ ग्रॅम सोन्याचे दागिने (किंमत ५.४७ लाख), चांदीचे दागिने (२५ हजार) आणि ५ लाख ७८ हजार रुपयांची रोख रक्कम असा एकूण ११ लाख ५० हजार ५०० रुपयांचा मुद्देमाल जप्त करण्यात आला आहे.