नाशिकच्या अशोका मेडिकव्हर हॉस्पिटलचे अस्थिरोग तज्ज्ञ डॉ. सागर काकतकर यांची ऑर्थोपेडिक ओपीडी आता जळगावमध्ये
| लोकमाध्यम न्युज | जळगाव (प्रतिनिधी) : दिनांक, १६, उत्तर महाराष्ट्रातील रुग्णांना त्यांच्या शहरातच अत्याधुनिक आणि तज्ज्ञ अस्थिरोग सेवा उपलब्ध करून देण्याच्या उद्देशाने अशोका मेडिकव्हर हॉस्पिटल, नाशिकतर्फे जळगाव येथे नवीन ऑर्थोपेडिक परिघीय ओपीडी (Peripheral OPD) सुरू करण्यात येत आहे. या ओपीडीचे उद्घाटन आणि १६ जून रोजी पियुष हॉस्पिटल, रिंग रोड, जळगाव येथे संपन्न झाले.यावेळी आयोजित पत्रकार परिषदेमध्ये डॉ. काकतकर यांनी आधुनिक अस्थिरोग उपचारपद्धती, सांधे प्रत्यारोपण शस्त्रक्रिया, क्रीडाजन्य दुखापतींचे उपचार तसेच रुग्णांच्या पुनर्वसनाबाबत सविस्तर माहिती दिली.
या नव्या उपक्रमांतर्गत डॉ. सागर काकतकर, वरिष्ठ अस्थिरोग तज्ज्ञ (Orthopedic Surgeon), अशोका मेडिकव्हर हॉस्पिटल, नाशिक हे दर महिन्याच्या तिसऱ्या गुरुवारी दुपारी १२.०० ते ३.०० या वेळेत जळगाव येथे रुग्णांची तपासणी व मार्गदर्शन करणार आहेत. या ओपीडीच्या माध्यमातून हाडांचे विकार, सांधेदुखी, गुडघेदुखी, कंबरदुखी, खांद्याचे आजार, कूल्हा व गुडघा प्रत्यारोपण (Joint Replacement), क्रीडाजन्य दुखापती तसेच विविध अस्थिरोगांवरील आधुनिक उपचारांविषयी रुग्णांना तज्ज्ञ सल्ला मिळणार आहे.
यावेळी बोलताना डॉ. सागर काकतकर पुढे म्हणाले, “आजच्या बदलत्या जीवनशैलीमुळे सांधे व हाडांशी संबंधित आजारांचे प्रमाण वाढत आहे. अनेक रुग्ण वेदना सहन करत राहतात किंवा योग्य उपचार घेण्यास उशीर करतात. मात्र योग्य वेळी निदान आणि उपचार मिळाल्यास अनेक गंभीर समस्या टाळता येऊ शकतात. जळगाव आणि परिसरातील रुग्णांना तज्ज्ञ सेवा मिळण्यासाठी नाशिकपर्यंत वारंवार प्रवास करावा लागू नये, यासाठी ही ओपीडी सुरू करण्यात आली आहे.” ते पुढे म्हणाले की, “अत्याधुनिक तंत्रज्ञान, मिनिमली इन्वेसिव्ह सर्जरी आणि सांधे प्रत्यारोपण क्षेत्रात मोठी प्रगती झाली आहे. योग्य रुग्णांना योग्य वेळी उपचार मिळाल्यास त्यांचे जीवनमान लक्षणीयरीत्या सुधारू शकते. या ओपीडीच्या माध्यमातून जळगाव आणि परिसरातील नागरिकांना दर्जेदार अस्थिरोग सेवा त्यांच्या जवळ उपलब्ध करून देण्याचा प्रयत्न आहे.
या प्रसंगी यशस्वी उपचार घेतलेल्या एका रुग्णाने आपला अनुभव उपस्थितांसमोर मांडला. उपचारानंतर झालेली आरोग्य सुधारणा, वेदनामुक्त जीवन आणि पुन्हा दैनंदिन कामकाज सुरळीत सुरू झाल्याबद्दल त्यांनी समाधान व्यक्त केले. तसेच डॉ. काकतकर आणि अशोका मेडिकव्हर हॉस्पिटलच्या संपूर्ण टीमचे आभार मानले.
अशोका मेडिकव्हर हॉस्पिटलचे केंद्र प्रमुख अनुप त्रिपाठी यांनी सांगितले की,अशोका मेडिकव्हर हॉस्पिटल नेहमीच रुग्णांपर्यंत तज्ज्ञ आरोग्यसेवा पोहोचवण्यावर भर देत आले आहे. जळगाव येथे सुरू होणारी ही ऑर्थोपेडिक परिघीय ओपीडी त्या दिशेने एक महत्त्वाचे पाऊल आहे. डॉ. सागर काकतकर यांच्यासारख्या अनुभवी अस्थिरोग तज्ज्ञांची सेवा आता जळगावकरांना स्थानिक पातळीवर उपलब्ध होणार आहे. भविष्यातही उत्तर महाराष्ट्रातील नागरिकांना अधिकाधिक सुपरस्पेशालिटी सेवा त्यांच्या जवळ उपलब्ध करून देण्यासाठी आम्ही कटिबद्ध असल्याचे सांगितले.याप्रसंगी वैद्यकीय क्षेत्रातील मान्यवर, तसेच जळगाव शहरातील नागरिकांची उपस्थिती होती.
ओपीडी प्रत्येक महिन्याचा तिसरा गुरुवार पियुष हॉस्पिटल, रिंग रोड, जळगाव येथे वेळ : दुपारी १२.०० ते ३.०० संपर्क : महेंद्र मोरे – ९६६५८ ८६८८५
