अखंड १० तास गाण्याचा जागतिक विक्रम करण्याचा प्रयत्न करणार किशोर सूर्यवंशी

| लोकमाध्यम न्यूज | जळगांव दि.५ : अवयवदानासंदर्भात जनजागृती निर्माण करण्यासाठी आणि जर्मनीतील आगामी वर्ल्ड ट्रान्सप्लांट गेम्ससाठी पाठिंबा मिळवण्यासाठी, जळगांव येथील किडनी प्रत्यारोपित किशोर सूर्यवंशी १० तास सतत गाण्याचा जागतिक विक्रम प्रस्थापित करण्याचा प्रयत्न करीत आहेत.आज ५ एप्रिल रोजी होणारा हा अनोखा उपक्रम अवयव प्रत्यारोपणानंतर आरोग्यदायी, आनंदी आणि आशादायी जीवन जगण्याची प्रेरणा देईल.

स्वतः किडनी प्रत्यारोपित असलेला किशोर अवयवदानाच्या प्रचारासाठी नेहमीच समर्पित भावनेने कार्य करीत आलेला आहे. त्याचा १० तासांचा गायन मॅरॅथॉन केवळ जागतिक विक्रम प्रस्थापित करण्यासाठी नाही, तर अवयदानाच्या प्रचारासाठी आणि जर्मनीमध्ये ऑगस्ट २०२५ मध्ये होणाऱ्या प्रतिष्ठित वर्ल्ड ट्रान्सप्लांट गेम्समध्ये सहभागासाठी निधी उभारण्यासाठी देखील आहे.

आगामी कार्यक्रमाबाबत किशोर सुर्यवंशी यांनी सांगितले की
हा उपक्रम माझ्या हृदयाच्या अगदी जवळचा आहे, कारण अवयवदानाने मिळणाऱ्या नव्या जीवनाचा तो एक प्रतीकात्मक प्रवास आहे. मला मिळालेल्या जीवनदायी किडनी प्रत्यारोपणाबद्दल मी खूप कृतज्ञ आहे, आणि आता मी समाजाला काहीतरी परत देण्याची संधी घेत आहे. अवयव प्रत्यारोपणानंतरही प्रत्येक व्यक्ती एक आनंदी आणि समृद्ध जीवन जगू शकते, याचा संदेश मी लोकांपर्यंत पोहोचवू इच्छितो.या प्रसंगी सुखकर्ता फाऊंडेशन चे संस्थापक डॉ. नरेंद्र ठाकूर, आनंद हॉस्पिटल व डायलिसिस सेंटर चे संचालक डॉ. अमित भंगाळे ,संजय सूर्यवंशी, लीना लेले -निकिता चौधरी,सोनल चव्हाण,विनोद सूर्यवंशी – मुसा शेख आदी उपस्थित होते.

छाया किडनी फाऊंडेशन, सुखकर्ता फाऊंडेशन व आनंद हॉस्पिटल यांच्या संयुक्त विद्यमाने या उपक्रमाचे आयोजन करण्यात आले आहे.

किशोर सूर्यवंशी आणि यांच्या टीमने सर्वांना या अद्वितीय कार्यक्रमाचे साक्षीदार होण्याचे आणि अवयवदानासाठी आपला पाठिंबा दर्शवण्याचे आवाहन केले आहे. हा जागतिक विक्रम प्रयत्न केवळ पाहण्यासाठी नाही, तर अवयव प्रत्यारोपणानंतरही जीवन जगण्याच्या जिद्दीचा साक्षात्कार करण्याची संधी आहे. अवयव प्रत्यारोपणानंतरनंतरही मिळणाऱ्या नव्या संधींचा आणि जीवनाच्या सकारात्मक बदलाचा तो एक जिवंत पुरावा आहे.

किशोर च्या या प्रयनांना प्रोत्साहन देण्यासाठी Music स्टेशन, E २३, दुसरा माळा, गोलाणी मार्केट येथे सकाळी ९ ते सायंकाळी ८ च्या दरम्यान सदीच्छा भेट द्यावी असे आवाहन टीम तर्फे करण्यात आले आहे

उपक्रमातून मिळणारा निधी किशोर यांच्या वर्ल्ड ट्रान्सप्लांट गेम्समधील सहभागासाठी आणि अवयवदानाच्या जनजागृतीसाठी वापरण्यात येईल.

किशोर सूर्यवंशी यांच्याबद्दल –किशोर सूर्यवंशी हे अवयवदानासाठी आग्रही प्रचारक असून, ते स्वतः किडनी प्रत्यारोपण प्राप्तकर्ता आहेत. किडनी ट्रान्सप्लांट करून त्यांना १७ वर्ष झालीत.नॅशनल ट्रान्सप्लांट गेम्स मध्ये आजवर त्यांनी ३ गोल्ड मेडल, २ सिल्वर मेडल जिंकले असून विविध देशात होणाऱ्या वर्ल्ड ट्रान्सप्लांट गेम त्यांनी २०१९ ला लंडन आणि २०२३ ला ऑस्ट्रेलिया येथे भारताचे प्रतिनिधित्व केले आहे. ते गाण्याच्या माध्यमातून आरोग्य, आनंद आणि अवयवदानाच्या महत्त्वाचा संदेश पसरवतात. त्यांच्या प्रवासाने अनेकांना अवयवदानाच्या या जीवनदायी कृतीकडे सकारात्मक दृष्टिकोन ठेवण्याची प्रेरणा दिली आहे.